أسئلة الدورات:هل نضحك على الدكاتره أم على أنفسنا

في الكتب الإنكليزية مثلاً ...
أسئلة الاخيار المتعدد، الموجودة في نهاية كل بحث من الأبحاث هي فقط لاختبار مقدرة الطالب أو القارئ على مدى فهم وحفظ ما سبق شرحه في ذلك الفصل.. وهي من أروع الطرق في تثبيت المعلوامات

فأنا أبحث عن مرجع عربي لاخبار مقدرتي الحفظية في مادة الميكوبيولوجياا مثلاً، ولكن للأسف لم أجد,,,

وحتى أسئلة الدورات قد لا ترقى لأن تكون بمثابة سبر معلومات فإن أكثرها يكون 100 سؤال، أما في الكتب الأجنبية فكل بحث له 100 سؤال :D

لذلك أعمل في موقعنا Med-Sci.net
على ترجمة كل الأسئلة المتعددة الخيار ليسهل حفظ المادة المدروسة..

وباختصار، أسئلة الخيار المتعدد، أو أسئلة الدورات قد تكون مفيدة في حال كانت ما يزيد على 500 سؤال فقط ..

تحياتي

حديثكم شباب كتير حلو ومنطقي
لكن للأسف الواقع يفرض أن النجاح والاختصاص على العلامة
وأنت بالتالي مضطر إلى اللحاق بالعلامة أينما وجدت

شكرا لكم جميعاً
Dr.Abody و ABo YaSSeR 4 EvER و The Storm و Cogito
بصراحة كلامكم منطقي و لكن أحدكم لم يتطرق للجانب العلمي..ما هو مصيرنا العلمي مع أسئلة الدورات..

كلام سليم أبو ياسر يعني مع 500 سؤال بعتقد المنهاج كلو صار أسئلة :lol:

It takes hard work to stay on...Top

Not same as all the rest

و اله ما بتصور الحق علينا اذا درسنا من اسئلة الدورات لأن الدكاترة لو ما بدن إيانا ندرس من أسئلة الدورات كانوا ما حطوا فس الاسئلة كل سنة و العترة على آللي ما بيجيب اسئلة الدورات و منشان المستقبل العلمي فالطبيب الناجح هو من يبني نفسه و ليس منهاج أو اسئلة دورات هي التي تبنيه

أولاً مرحبا يا جماعة و هاي أول مشاركة إلي و برافو على كل واحد فيكون طرح هالموضوع و رد ، بأتاسف أني رح طول بالحديث بس و بكل تواضع بقلكون أني إلي باع طويل بالموضوع بحكم شغلي بالمحاضرات و الدورات على مدى أربع سنين :
بخصوص موضوع أسئلة الدورات باتفق جداً مع عبودي على هالنقطة ... لأن غاية السؤال سبر معلومتك و بالتحديد الفكرة يعني مثلاً :
جرح مع تلوث بتراب أو طلق سلاح ناري = فكر بالكزاز ، لا تعطي طفل مرتفع الحرارة أسبرين = لا ما ينصاب بتناذر راي .... سؤال يتكرر كثيراً في مادة الجراثيم أو الأدوية و على رأي المدرسين سؤال محروق لكنه سؤال يبحث عن فكرة تصطدم بها يومياً و عيب عليك ما تعرفها
للأسف اللي عم يصير أنو الطلاب عم تحفظ الأسئلة حفظ و تفوت على المادة و هالمشكلة على فكرة مو بس بجامعاتنا إنما بكل جامعات العالم حتى البورد الأمريكي
يا شباب .. أنا عم اتحضر لتقديم USMLE Step 1 و الحمد لله كنت ادرس كتبه بالمشاركة مع كتبنا و نوطنا خلال السنين الماضية و لذلك تصورت أني ماني محتاج كثير وقت للتحضير لكن و أول كلمة انقالت قلي من اللي قدموا هالفحص : بلا ما تحل نماذج أسئلة من الكتب الأمريكية و من أسئلة البورد نفسها (الشباب السورية اللي عم يقدموه عم يتذكرو الأسئلة و يكتبوهن ،،، بدكون أحسن من هيك غلبنا الأمريكان) ما رح تنجح و لو حفظت و درست و فهمت كل الكتب .
و بخصوص الشب اللي قال أن الأسئلة عم تتهرب تهريب بحب نبهك أخي لنقطة أنو الأسئلة يا إما عم تنشر بشكل رسمي أحياناً من خلال تعليقها بلوحة الأعلان و لكن هالحكي ما عد صار من زمان ، أو من خلال حفظ الطلاب لألها و تذكرهون بعد الفحص و بصراحة هذا هو المصدر الأهم و الأكبر و اللي حالياً بيشكل بعدد من المواد حوالي 300 أو 400 سؤال ، و المادة مهما تغيرت العلم ما بيتغير و خاصة إذا الدكتور كان هدفو من الفحص سبر المعلومات .
و على فكرة أنتو فتحتوا الباب قدام نقطة كبيرة و موضوع مهم جداً و من خلاله بتميزوا أنواع مختلفة من الدكاترة :
1- دكاترة بتكرر الأسئلة كأفكار لازم أنت كطالب تطلع مستوعبها من المادة و تكون قاعدة بمخك كل ثانية و ما تطلع منه ، و هون الحلو بالسؤال أنك لازم تقرأه كفكرة علمية و ليس كسؤال و هيك أخي بتفيد حالك كعلامة و كمادة علمية ، و هذول كل سنة بيضيفوا 20 - 30 % أسئلة جديدة بس بعد كم سنة أكيد رح تقدر تلم البنك ، و مثل هيك أنواع من الدكاترة هن برأيي الكويسين و بيشجعوك تدرس مادتهن مهما كانت صعبة .
2- دكاترة بتحاول أنهم يعملوا مثل المجموعة السابقة بس بيوقعوا بمطب تكرار السؤال الحرفي و هون نحنا كطلاب بنصير نبصم السؤال بصماً و هذا بيصير أكثر الأحيان بالمقررات الكبيرة ، و بيسيء للمدرسين للأسف و بيأدي لمشاكل أحياناً . حيث بيصير الدكتور مسخرة بين العالم أو ينظرولوا العالم نظرة مو صح مية بالمية
3- دكاترة لا تجيد وضع الأسئلة و تلجأ إلى الأسئلة المكررة و هذول على فكرة عم يقلوا لأنو هالبنك اللي عندهم عم ينكشف سنة ورا سنة من خلال الأسلوب الي عم تلم فيه الطلاب الدورات .
4- دكاترة تحل المشكلة باختراع الأسئلة من المريخ و الله يجيرنا و يجير الكل من هالمصايب اللي بلشت و الحمد لله تقل .
و على سيرة تعويض المعلومات .. كل شيء بوقته حلو و الواحد لازم يدرس كل مادة بوقتها و ممكن أنو بعدين بالصيف أ, خلال أخذو للمادة يقارن و يقرا (انتبه يقرأ مو يدرس) و برايي لازم طالب الطب يكون (((حكيم)) <كلمة كثير بحبها أكثر من دكتور> و يعرف أنو من مادة الجراثيم مثلاً لازم يكون آخذ فكرة عامة عن كل جرثوم سريعة و مفيدة بس مو ضروري مية بالمية يتذكر كل مزارع الجراثيم و طرق الكشف بعد الفحص (أكيد الواحد بالفحص لازم يدرس الشغلات التفصيلية مشان علامته) ، بس عيب عليه ما يتذكر أنو العنقوديات جراثيم مقيحة و انو الميكوبلازما ما رح تستجيب لا على البنسلين و لا على السيفالوسبورين و لا على الفانكوميسين لأنو ما إلها جدار خلوي ... و للأسف هالأمر بيتكرر كثير و بيتسبب بإساءة لمدرس مادة معينة صعبة شوي بس مهمة و الطلاب كالعادة نسيوا بعد الفحص هالمعلومات الأساسية و بيجي شي دكتور بالسنة اللي بعدها بيسأل الطلاب عن هالشغلة بيقولوا ما بنعرف فبيهز هذاك راسو و مدري شو بيقول بقلبو عن دكتور السنة الماضية

و شكراً للجميع و بعتذر على الغطالة بس إن شاء الله كون فدتكم

بصراحة مانك معذور على الغطالة .. ولكن معذور على الإطالة.. ههه عم امزح معك

فكرة جوني ووكر عن تكرار سؤال لفائدة سريرية غير منطقية لأننا نحفظ الأسئلة بصم وننساها بعد الامتحان

مثال: كان عندي رفيق عم يحفظ بأسئلة الجراحة .. فقال لي بهذا السؤال نختار الاحتمال الذي ليس فيه حرف سين
فما رأيكم دام فضلكم ...

لا والله .. لأنو يلي بيبدأ اسمو بـ (غسان)؟؟؟ عفواً بحرف الغين يمكن ما طلعت معو الجراحة

في البداية شكراً على الموضوع الرائع
بس بصراحة المشكلة لاتنبع من الطالب
لأنو الطالب في أغلب الفروع عم يدرس من شان العلامة يعني أنا برأيي لازم يخفضوا نسبة القبول في الاختصاصات على المعدل ويكون في النهاية امتحان للطالب لمعرفة مدى استيعابه لفرعه اللي درسه
أما لما الطالب بيشوف أنو أي شي يتطلب معدل عالي وعلامات عالية فصار لازم يسعى لهذا الشي بأي وسيلة ومنها أسئلة الدورات
في النهاية بتمنى يتغير هالأسلوب....
وشكرا مرة تانية

والله يعطيك العافية لأنك خليت كل واحد يوضحلنا وجهة نظره عن الموضوع
و أنا برأيي أنو الصح و اللي لازم عنجد يصير :
الطالب أثناء السنة يفهم المادة و قبل فحصها يعيدها و يخلي شوية وقت لأسئلة الدورات(حيث يجتمع مع أصدقائه لحلها).
و هيك بيأمن العلامة و الفهم
و ما معقول الطالب يقعد من أو ل السنة يدرس بأسئلة الدورات
و ما معقول هو يفهم المادة منيح و غيره ياخد العلامات

والله يا جماعه ما بعرف شو بدي قول بهيك موضوع
بس انا شخصيا ما بآمن بشي اسمه اسئله دورات
وعمري ما قريت اسئله دورات
بدرس هالمقرر وبركزه
وبروح ع الامتحان
بظن هيك رح استفيد اكتر لانه الي بيقرا دورات وبيرفع المادة معدل فعاقبته رح تكون وخيمه صدقوني
وهذا كل شي عندي
وبشكركم ع الموضوع الحلوووووووووو والمناسب