الاكتئـــــــــــــــاب

يعطيكم العافية شباب و صبايا .. كيفكم ؟

من بعد عجقة المذاكرات خطر ببالي أحكي عن موضوع أو بالأحرى فسرلكم كلمة كتير منا و أنا أولكم رددتها الفترة الماضية عالطالعة و النازلة .. بدون ما فكر بالمعنى الحقيقي لهالكلمة و شو بتعني بعالم الطب النفسي ..

الاكتئاب ... الكلمة الأكثر تداولا بين طلاب الطب و الصيدلة ..

ياترى شو الاكتئاب ؟
هل هو الحالة العابرة اللي بتصيبنا لما مننزعج من دراسة ، من موقف صار معنا ، من مخانقة مع صديق .... أكيد لاء ..

طيب تفضلوا لناخد فكرةعن الموضوع ..

الحالات الاكتئابية يا جماعة بتنقسم لنوعين :
1- اكتئاب داخلي المنشأ :
2- اكتئاب خارجي المنشأ
و بما أنو الحالة التانية هي الأكثر شيوعا و هي اللي على أساس بتصير معنا ( لاسمح الله ) رح نحكي اليوم عنها بالتفصيل ..

يحدث الاكتئاب خارجي المنشأ عند شخصيات تحت طبيعية أو مرضية صريحة يعني ما بتخبي حالها ، و يحدث لأحد سببين :
1- ارتكاس لعوامل محيطية راضة ( صدمة عاطفية ، مشاكل مادية ، ... ) و هذا ما يسمى بالاكتئاب الارتكاسي
2- نتيجة لصراع عصابي لا واع ٍ أعيد تفعيله بوضع حالي لا ينبئ عند معظم الناس بحدوث اكتئاب ( زيادة المسؤوليات الحياتية ،تغيير مكان الإقامة ، الابتعاد عن شخص له احترام خاص ..) و هذا ما يسمى بالاكتئاب العصابي

و أحيانا يكون سبب الاكتئاب انهاك عاطفي و انفعالي خفيف و لكنه طويل الأمد أي تراكم مشاكل و خلافات مستمرة ....
و ممكن يكون سبب الاكتئاب الهجرة و الاغتراب و النفي و هذا ما يسمى باكتئاب الهجرة

و بالإضافة لهالعوامل في كمان اضطرابات شخصية مهيئة للاكتئاب مثل الشخصية القلقة التي تتصف بفرط حساسية و بعض الشخصيات العصابية الصريحة كالوسواسية و الهيستيرية ..
و النرجسيين و غير الناضجين و الذين عندهم شعور مستمر بعدم الأمان و نقص الثقة بالنفس و الحاجة الشديدة للعطف و التقدير و الاعتماد على الغير ...

و هون لازم نركز على شغلة و هي تقييم العلاقة بين أهمية الوضع الراهن و المريض لتحديد السبب الأساسي للاكتئاب

ما هي الأعراض التي تظهر على مريض الاكتئاب ؟؟ خلينا نعرضهم من الأخف للأشد ..

1- القلق : يكون ظاهرا و مسيطرا على اللوحة السريرية و يترافق بتظاهرات جسمية مختلفة فالمريض يشكو كثيرا و يطلب العون و المساعدة و الإصغاء له من قبل الآخرين ( تذكرتوا حالكم ليلة الفحص ؟؟ )
2- النهي النفس – حركي : يتجلى بالتعب و الوهن و عدم القدرة على مواجهة الحياة اليومية و ذلك دون أن يتحسن هذا التعب بالراحة
3- السلوك الانتحاري : شائع الحدوث ، و هو يشكل نوعا من طلب المساعدة و الضغط على المحيط ( يعني متل ما بيقولوا محاولة للفت الانتباه .. )
4- اتهام الذات : غير موجود . بالعكس قد يتهم المريض محيطه ، و يعتبره مسؤولا عن تدهور حالته ، يشعر المريض بالعزلة و الوحدة و الخزي
5- الارتكاس للمحيط : كبير و مهم ، إذ يحمل الاستشفاء و محاولات المعالجة وحدها راحة نفسية للمريض و تخفف قلقه ، لذلك فإن علاقة المريض بمحيطه لها تأثير كبير على سير المرض .
6- التأثيرات الجسمية : دائمة الحدوث و هي ناجمة عن القلق و تشمل :
- اضطرابات في النوم ، إما رق مع كوابيس أو زيادة ساعات النوم ( يرحم أيام البكالوريا لما كنت نام و ما أشبع نوم .. )
- اضطرابات الشهية : قهم أو شراهة
- اضطرابات جنسية : غياب الرغبة الجنسية
- أعراض تحويل : اضطراب إحدى الوظائف العضوية مرتبط بصراع أو حاجة نفسية

و هيك منكون حكينا بشكل مفصل عن أعراض الاكتئاب ...
شو رأيكم ؟ لسه حدا يقول مكتئب ؟؟؟؟

تحيــــــــــــــاتي للجميع ...

__________________________

علمت قلبي عالحكي .... نسيتني كيف البكي ....